هرج القفى بالمجتمع صار دستور
تسعى لتطبيقه عقول ٍ سقيمه
ولايسمعون مقدم النصح والشور
تجاهلوا كل الحلول السليمه
تفاخروا بالكذب والحقد والجور
ومابينهم دارت معارك مقيمه
بمجالس ٍ شيطانها لاعبٍ دور
زين لهم نقل الحكي والنميمه
يامدورين الشر والشر محضور
المجتمع يشكي خطر هالجريمه
بسبابكم ياكثر من عاش مقهور
راحت ضحاياكم نفوساً كريمه
ياهل النفوس اللي تجلّى بها الزور
تريحوا ترى العواقب وخيمه
استيقظوا من ظلمة الجهل للنور
خلّوا متاهات الذنوب العظيمه
من خاض باعراض البشر شخص مغرور
دنياه ضاعت والنهاية أليمه
بارادة اللي خالق ٍ بر وبحور
ينصف إلـ مظلومٍ شكى من ظليمه
لاتنخدع لو تمهل إسنين وشهور
لابد مايقاضى خصيم للخصيمه
وان كنت تبغى تعيش هاني ومسرور
امفارقت بعض المجالس غنيمه