دايم أنا والليل ياثقل دمه.!=بعض الطواري يحرمّني مباتي
في مهجتي كني مكلف مهمه=وأنجازها ماهو على مشتهاتي
صبري قضى وأحوال قلبي وهمه=جدّد قديم جروحي الخافياتي
الوقت جاري بين كيفه وكمة=حيل الله أقوى ملتزم في سكاتي
لولا العقل قد كان جبت المطمة=غفى خيالي لأجمل الذكرياتي
ياعين من تشرف على رأس قمة=شيهانةٍ وأوصافها وافياتي
مدري يشم الورد والا يشمه.?!=والا أكيد أثنينهم بالصفاتي.?!
حنيت مثل الورد لاغابت أمة=لاينقطع حبل الوصل ياغناتي
البعد مثل الليلة المدلهمة=غاب القمر ونجومها خافتاتي
طيفك يباريني مع كل يمه=من وين ماوجهت باربع جهاتي
أستغفر الله من كلام المذمة=ماباقي الا أذكرك في صلاتي.?!!