صــــوت فلاح سعود العازمي
من جنوبٍ عندي اغليه لين اقصى الشمال = من فلاح سعود توصل حمد حلحيلها
والله اني خابره من مشاكيل الرجال = ومن قرومن باللوازم تفك دخيلها
قم نوينا للسفر ياحمد شد الرحال = والوعد من بيننا عند حد مقيلها
لك تخيرت السمينه وجنبت الهزال = من علومي يابن مزعل وابي تصحي لها
فارسن لبسه من الجوخ مايلبس سمال = والذيابه يابن مزعل عشاها ليلها
ما جزعنا والله انا كما روس الجبال = وماحنينا روسنا الا على تهليلها
يالسنافي حيرتني صواديف الليال = ماخذيت العدل منها وماأكثر ميلها
جيتها من طيب خاطر ولا عطتني مجال = من عناها يابن مزعل رجعت اشكي لها
صدق اني تهت بين الحقيقه والخيال = مرتين اشوم عنها وعشر اصغي لها
ماجرعت المر منها ولا ذقت الزلال = والله اني بين يدها وبين ارجيلها
احسب ان الوقت يصفي واثره اكبر محال = مثل راجي مدت ً من كفوف بخيلها
والله اني ماترجيت لو ربع احتمال = الرجال مقيد ً ياحمد تحصيلها
ياحمد ما كل شي ً نعده راس مال = والبروق اللي تكاشف ماعاد نخيلها
لارقيت طويق منها ولا جيت السهال = والليالي سرجها مانزل عن خيلها
سالفتنا ياحمد لا حرام ولا حلال = لاتهاون بالقضيه وابي تحليلها
الله اللي بدل الحال من حال الحال = والرقاب القاصره ماهقى تطويلها
يا حمد عطني جوابك اليا وصل السؤال = والله اني ماشكيت إلك نافل جيلها
صـدى حمد السعيد
عارضن من راس شاعر سرى برقه عدال = يوم جزلات القصايد طفى قنديلها
حدر الوادي الجنوبي علينا يوم سال = والقصايد والله انا نداري سيلها
والله اني من سنا البرق مسيت الحبال = والصعايب عند رب الملا تذليلها
يوم بانت لي القصيده تدنيت الدلال = قلت باشرب والمعاني تعانق هيلها
ارتفعت لمن رفعني مع زين الخصال = وقمت اهلي بالقصيده واعير كيلها
نومستني في شموخ ً رقا روس التلال = شفت فيها عزة النفس تباري ويلها
مرحبا باللي شرى خوتي دون العيال = مرحبا به والركايب علي ترحيلها
اجزم وتلقى الظفر والكرامه والدلال = والحمول الكايده عنك انا بشيلها
كل واهج له شمس كسرةٍ دون الظلال = وعن سموم القايله لك براد نخيلها
القلوب العارفه مايجي فيها جفال = والنفوس الميته لاترجى حيلها
والله اني عند وجهك اليا قط العقال = كل عثره جعل رب العباد يزيلها
كل بيت بالقصيده يماري بالجمال = والمعاني المبعده عندنا دربيلها
ماشكيت الا من الوقت الاقشر يوم مال = كل امانيك زمانك ورا تعطيلها
يالبريكي واجد اللي شكو دنيا الزوال = كم عيونن من زمنها تعب منديلها
دام لا حاصل جفا منها ولا من وصال = غيرك من الناس ياما شكى تنكيلها
قو باسك لاحصل بالزمن هذا خمال = وانت مثلك عارفن راسها من ذيلها
لاتغير مبدئك والزمن كله ميال = والنصارى عيبها حرفت انجيلها
يانسل من بالوغى مايهابون النزال = الحقايق هالزمن قاوين تبديلها
الرسوم البينه ماتغطيها الرمال = والرقاب العاليه كايد ً تنزيلها
محتمين الدار يوم ٍ ردي الحظ عال = من بواريد السعد لا اشتعل فتيلها
مجدكم من ماضيات السنين ولا يزال = وكل صوره يالبريكي لها ترتيلها
جاك ردي يالمعنى وانا برميه فال = وكان ماصبت الهدف غامض ً تحليلها