مني ياابوفيصل سلام وتحيه=وأبيات أنقيها من ورود بستان
الورد واجد ماقطف إلا زكيه=وأجيبها في عقد لولو و مرجان
أيه افتخر في جيرتك وش عليه =وفوق الرفاقه مثلنا مثل الأخوان
من طيب صيتك صغت لك مزهريه=فيها من الابداع أشكال و ألوان
مهدف وراها لا عطا أو جزيه=لكن قسم بالله قدر(ن) و عرفان
وأهديتها بأسم الصداقه هديه=عشان لويقرونها تذهل أذهان
خذها عساها بالمعاني غنيه=يالنادر اللي من يخاويه ربحان
في جيرتك ماشفت جحد وأذيه=في وقت غيري من غثا الجار بلشان
ولاشفت في خوتك حسد وخطيه=ياطيب حظي دام الاصحاب ميزان
حثيك خوي(ن) مايخلي خويه=لظلم ظلام الظلم مابات خسران
أنت الرفيق اللي له النار حيه=ولك طلة(ن) يفخر بها كل ديوان
مثل المطر يغسل صدور البريه=مثل الذهب مهما عتق فاق الأثمان
يامكرم الضيفان صبح وعشيه=فيك الشجاعه و الجماله والاحسان
يالحر لامن حام صاد الوفيه=قرم(ن) تسريه الشهامه.. بليهان
درب المراجل من علومك مليه=واللي سأل عنك جوابه كحيلان
صنديد ...فارس والعدو ياشقيه=مقدام...كايد كل ماطب ميدان
جربت..في فزعتك عز و حميه=في جلستك..في هرجتك ثقل وإيمان
تعطي ولكن تختلف بالعطيه=فيك العطايا تفتخر لوهي أنسان
ماتقول غير أبشر وجاتك سخيه=ياعل من رباك يسكن بالجنان
والله يسخر لك دروب(ن) هنيه=وأنا على يمناك ياذرب الايمان
يعني معك في كل روحه وجيه=سيفك ودرعك كل ماغار عدوان
وأختامها ذكر الولي ثم نبيه=أعداد ماهلت من الوسم الامزان