صوت أحمد النويعم
.
.
.
بسم الله أبدا وأبتدي ولاخاب منهو به بدا=بأبيات شعرٍ صمّ قلبي عن لسانه قالها
سلام يازبن الضّعيف بعداد قطرات النّدا=من خافقٍ هايض بفكره بالقوافي شالها
حثنا بها محمد رسول الله على درب الهدى=بحلول شهر الخير نبعثها بعَدّ إليالها
كل عام وأنت بخير من صوتٍ يجيلك له صدا=نظّم لك الأبيات في فكره وحل إحبالها
توصلك يالشّغموم يالي بالمراجل ما غدا=ياللي علوم الطّيب من مدح المراجل نالها
من لابتي عوازم ٍ ماتعرف دروب الرّدى=اللي زهول المرجله ترمي بذكره إعقالها
قم ياعشيري وإحتزم بلعب على طرق الحدا=النار حيّه والمواقف مالها إلا إرجالها
ياصاحبي قلبي من الأحزان أتعبه الجدا=وجد العجوز اللي إتوجّد يوم ماتوا عيالها
على وليفٍ بالهوى حالي ومالي له فدا=غروٍ إليا منّه هرجلي هموم صدري زالها
قفّا وشمّت ياعشيري بالهوى كل العدا=وأنا الذي ظنيت نفسي شفّها وخيالها
وش حيلتي ياصاحبي صوله مثل قلع المدا=إبعيد عن نفسي ولا أدري كيف أنا برقالها
تكفا يا بوخالد إن كان الشّعر يوصَلْهْ نَشّدا=ليه التّغلي والجفا منّي وش اللي جالها
هذا الذي وسط الحشا بأبيات شعري أكّدا=من هاجس ٍ لا مثّل الأبيات جاب إجزالها
.
.
صدى بدر خالد الرميح
.
.
.
بسم الله أبدي للرِّفيق اللي نِصَاني إمحَـدِّدا=بأبيات شعر ٍ قالها يُومَه وصَلني إرسَالهَـا
يا مَرحبَا يا إبن الرِّجَال اللي فعُوله مِجَّـدا=وأنا معك هيِّضتني بأفكار شِفت إخصَالهَـا
رسُولنا محمد عليه ألف الصَّـلاة إمـرَدِّدا=ويا الله تسَاعدنا على الطَّاعه وكِلّ أفضَالهَا
وعسىَ حياتك كلها بخير ٍ ولا هـي نِكَّـدا=والوافيه وَصْلَت وهـي مَحبُوكَـةٍ بأقفَالهَـا
جتني بيوتك وافيـه وردِّي عليهـا موَكِّـدا=يا إبن القُروم اللي تنومس عارفين أفعَالهَـا
حِنَّا العَوازم لابةٍ والسَّاس فينَا إمخَلِّدا = نَبقىَ على طُول الزِّمَن مَعروفةٍ بعدالهَا
العين تَدمَع لا لطَمت الخَشِم صِرنا إمقَـرِّدا=وكلِّي فِدالِك يا بوراشـد فَالوَغَـا شيَّالهَـا
زَهَمتني وأنا إحتزمت وإلاَّ الضِّعيف إمجَرِّدا=وحِنَّا لهَا وقت الشِّدايـد راقييـن إجبَالهَـا
هذي هي الأحزان دايم جعلها مـا تعَـوِّدا=لكن بَلاك إمن الجُرُوح اللِّي ما تلقىَ إدوَالهَا
والله لو هي بالدَّراهِم هَاك مَالـي إمرَجِّـدا=وهمُوم صَدرك هَاتهَا وأنـا لهَـا حَمَّالهَـا
ولا قَفَّت الجَادل عسىَ فالِك هَنُوف إمفَـرِّدا=وما للسُّوالف يا عشيري في دُرُوب إخمَالهَا
وإن طِعت شُوري خلَّها لا تصير فيها إمقَيِّدا=تلقىَ من الخَفرات واجد لا بغيت أشكَالهَـا
يا صَاحبي مَالِك جدىَ عقلك براسِك سَيِّـدا=وإتعب على اللي تشتري لامن بغيت إكمَالهَا
وإنشِد مجرِّب حَايفٍ بيض العَذارىَ إمعَدِّدا=ويا الله بحسن الخَاتمه بدقَاقهَـا وإجلاَلهَـا
هذا جُوابي يالنِّويعم يـوم جيـت إمسَنِّـدا=وإسلم يا بوراشد عسىَ حَالك تطيب أحوَالهَا
ولا تِحْزِن القَلب المِشَقَّىَ والجُرُوح إتضَمِّدا=وأختم كَلامي ليتني أقـدَر أشيـل إثقَالهَـا
.
.