.
.
.
وينك فقدتك ماسمعنا لك اخبار=ماتدري اني من غيابك اعاني
خليتني بين الرجا وبحر الافكار=ماغير اهوجس بالرجا والأماني
هايم مع الهوجاس والقلب محتار=والهم غيم بين عوج الحواني
حتا لذيذ النوم من بعدكم طار=شف حالي من كثر العنا كيف شاني
لاقلت بنسا هزني كل تذكار=تكفه طلبتك خل نفسك مكاني
لو تدري ان خافقي فيك مابار=والله ياقلبك مايحب شخص ثاني
من سبتك احس في داخلي نار=تزداد لامرت علي اثواني
ارجع طلبتك خافقي منك منهار=ياملح شعري ياحسين المعاني
غالي ولك بالقلب حشمه ومقدار=تسوا جميع الناس قاصي وداني
ارجع ولاني طالبن منك اعذار=دق الجهاز وزف معك تهاني
لاتعتذر بالوقت ولا بالاقدار=الوقت يمضي والمفارق كواني
ارجع ولاني ناشدن وش معك صار=ارجع مدام العمر قاضي وفاني
شرحت لك ماصار في همس الأشعار=من صم قلبي قلتها في لساني
.
.