يقول اللي ليامن قال ماتعسره الامثالي=محنك والقصايد مايكسر فى مبانيها
علومه بالقصايد طيبه وطوال وجزالي=ولاإيضيع قوافيها ولايظعف معانيها
حباله بالبحور الكايدات إمتان وطوالي=على كل البحور إموصله مابحر يثنيها
ليامنه تهيض مايجي لعبه على الخالي=قصيده ماتطيعه ماينام إلا يسويها
تجيه العاصيه دايم على مايرغب البالي=ولايرتاح لين الناس تحفظها وتمليها
ينقحها وتقعد ماتروح أيام وليالي=على شان الرجال اللي ولازله تعديها
على بيض الورق يكتب ولايحتاج جوالي=يدينه فالقلم فوق الورق مبطي مظريها
يضيع اللعب بالجوال يلقى فيه مدخالي=ورجلن يتبع الجوال يخطفها ويخطيها
إله عشر إسنواتن يدرس الموروث ويلالي=ياكثر اللي كتب لاكن عن العربان مخفيها
فنون الشعر يعرفها من الاول ليا التالي=وإله بعض إبتكاراتن على الشعار مهديها
دخل بعض المدارس مادخل من نقص وهزالي=دخل من شان يحفظها ويعطيها ويحميها
مايسرق من معانيها مايلغي جهد الابطالي=ولايجحد جمايلها ولاإيقلد قوافيها
إله دربن لحاله ميزه بجداد وسمالي=أساليبه كثيره ماتشابه معتني فيها
على الفطره تجيه الفكره اللي مالها أمثالي=ولايقعد يدورها ولايرضى توطيها
ليامنه بغى القصه تجي كالسكر الحالي=خياليه حقيقيه يضبطها ويرويها
ماقلد جيله التالي ولاماضين الاجيالي=إله معناه لاكن خطوته تتبع خطاويها
عن إدروب الرجال الظايعه شينين الاقوالي=تجنب مامشى إلا مع بشر تثري مماشيها
على نهج الرجال الاوله ذربين الافعالي=مشى واللعب والمعنا نزح عيا يخاويها
لحاله ماتلبس لبس زولن ظمن الازوالي=لباسه عن لباس الناس معجبته ومغليها
إله عامين عن شعر النبط متغيبن سالي=يجر الصوت بالميدان والعيال يلويها
رجع للنظم خلا العامريه بشهب اللالي=لحيث العامريه شرستن تدمر مهاويها
ماتترك له من الانتاج مايرقيه الاجبالي=تجي منه القصيده عاجزه من هجر راعيها
تجي هزله يجي فيها خلل ماترقب العالي=عن الاحداث تقصر والقظايا ماتغطيها
يشوف إجروحها مهبولها خطره ولاإيبالي= يعاند له عرب والصدق مايقدر يداويها
هذا علمن يخص إرجال ويجنب عن إرجالي=يجنب عن هل الثنتين ماوالله يشنيها
اعد الصدق وانصف كل من حاله كما حالي=ولاأظلم كل من بمثاله العربان مرضيها
كثير اللي سطع نجمه وهو ماكال مكيالي= من إبحورن غزيراتن ماوصل إلا إلشواطيها
حشا ماذم خلق الله ولاني رجل محتالي=مايرمي صاحبي ياكود من تبغى مراميها
مزعل صاحبي قومن ماتلقى ربع مثقالي=من الموروث وتدور لها ذكرن لساميها
ذكرها بالمعاني ماعطاها لاهب الصالي=على كوياتها اللي جاتها ماهوب كاويها
بخلي عالمن مالي بها مرقد ولاإظلالي=وبدخل بالسلاح إبغابتن تذعر ظواريها
بحل المشكله مع صاحبي محمود الارسالي=ولاني رجل متحسف على اللي ناوي ألغيها
صحيح إنه من الثنتين موهوبن من الوالي= ولاكن لازمن نختار له وحده ويثريها
خلاص الحين أبثبّت معك يالنظم مدهالي=أبعطيك السنين اللي بقت لي مع لياليها
يجي للعامريه من يحب الصيت والمالي= ماهيب إلنا ولابالنت تصلح يوم أغنيها
معك يالنظم أبصفى يوم اشوفك دوم تصفالي=وبرقا معك يم اللي معك تحفظ مراقيها
أشوف الناس بسمك تشرب إمن السيل لاسالي=وأنا قادر وطفي شعلتن تفقر مطفيها
أذكي حيتن تنصر صديق إبهوش وقتالي=وعرظها الرياح اللي نبات الارض تمحيها
عليها دموع عيني كنهن وبلن من إخيالي=عجيبه كيف تبكيني وأنا رجلن مذكيها
دمرها مني الهجران والليله من إقبالي=عليها لازمن ترجع بعزم إيعيد ماظيها
خذت مني غيابن عن مواصل دربها طالي=وأظن اليوم ماجاها من إغيابي يكفيها
حصيلي من غيابي ضاعت أطيب وأجزل اعمالي=وقلبي حيل هملها وحطم كل أمانيها
بذن ربن ليامني سعيت بخير يسعالي=أبرجع للكنوز اللي تسلينى وسليها
على هاك الطريق اللي مايلقابه من إخمالي= بحث الرجل لين الرجل تثبت من مساعيها
أباوصل تباشير الرجوع إل كل عذالي= وبعطيها إبتسامه تحترق منها وتنهيها
بعيدك ياطموحن منك كل إمحال ينهالي=وببني بك بناية عز تذريني مذاريها
ولاني ناسي اللي لجلها ضحيت بالغالي= هنوفن تسكن بقلبي عسى ربي يخليها
هواها يوم حول فى خفوقي زود إهبالي=من أسبابه عيوني عيت إتوقف عباريها
عشان اعيونها اللي دوم تجذبني من اميالي=ابواصل ولاني بالقصيد العذب ناسيها
ابذكرها ولاني قايلن شي ن ماينقالي=وذكرها بحبن فيني إمن اسنين مغديها
يوم إني شفتها لجلي تشيل اللي ماينشالي= ولاطاعت بي اللي بالقطيعه كان يوصيها
تعلق قلبها فيني وأنا قلبي لها مالي=عشقها عشق منه الحال كل ماتغيب يطويها
همومي من سببها فى خفوقي دوم تنهالي=تدكه دك لامنه عليه حل طاريها
أحب البنت هاذي حب أجاهربه ولا ابالي=ولجل إعيونها بالسوق ابيع الناس وشريها
لها قدرن بقلبي لو يزول اطويق مازالي=وحبن بعد ربي مايزول إلا من ايديها
جمعنا السلم الاول ورتقينا بطيب وافضالي=ولافينا مشى مع طرقتن تمحق عوافيها
ماكنا إنخوض بعلومن لها بالنار منزالي= ولاكنا نفكر مثل من تسقط بواديها
سوالفنا مثل فضل المطر لاطاح برمالي= تبل إعروقنا وقلوبنا بالحب تحييها
حشا ماصار منا شي بقفاين وبقبالي=نجي ونروح بنفوسن عظيم الشان هاديها
تعاهدنا مايفرقنا كلام إمعذرب الخالي=ولانجزع من اللي بالخنا تاخذ مناويها
تصافينا ولاجا بالعهد خله ولاإهمالي=ولازلنا نصون العشره اللي طاب ماضيها
كلام الناس لاجانا نعرضه الخلا الخالي=ولايومن جرحنا هرج من خابت مجانيها
وصايانا حفظناها مثل مايحفظ المالي=ولاأغوانا مريدن بعض خلق الله مغويها
محبتنا بقت بقلوبنا تنهل من إزلالي=شعورن صادقن بالعز والمعروف بانيها
هذا ماصار منا والحقيقه دوم تنقالي=وأنا رجلن بقول السالفه مانيب كاميها
رجوعي للقصيد العذب من مستورة الحالي=عسى ربي بما سوت معي بالخير يجزيها
وعد مني لواصل لجلها بالشعر وأنقالي=قصيدن من صميم القلب عن مافات يغنيها
اقوله بالنهايه والوعد من راس رجالي=قسم لروي عطشها وبكنوز الشعر لكسيها