كـتـمـت الـشــوق ياقــلــب المـولع وانطفت ناره=تركــت الحـب ودروبه بلا هم وبلا حرمان
عسى الله يصلح احوالك مع اهل الدين وانصاره=وتسلم كل نبظاتك على طاعت رفيع الشان
فلا به خـيـر فـي نـفـسٍ لدرب ابلـيـس مختاره=ولا به خير في قلبٍ قضى عمره بلا إيمان
ألا يا الله ياعـالـم بـحــال الــعـبـد واسـراره=رجيتك تغفر ذنوبي وتبعد عني الشيطان
(نـسـوّف) دايـم بـتـوبـه لـكــنّ النـفـس أمـاره=ويقضي عمر الابنادم وهو في معصيه غرقان
نتوب, ونعصي, ونرجع, وحال الوضع تكراره=ولكن خير من يخطي يعوّد تايب وندمان
وش اللي ينفع المـذنب في يـومٍ تبطل اعذاره=وكلٍ ينظر اعماله وهي توزن على الميزان
فـريـقٌ فاز بالـجنـة والآخــر في (سَـقَـر) داره=عسى الله يرحم المذنب ويغفر زلّت الغلطان
ألا يابخت من يسكن بقـصـرٍ والنـبـي جاره=في رحمة ربي الجنة مناة المؤمن الشفقان
في قصرٍ من ذهب (لبنة) وفضه تكسو أسواره=وطين الأرض من مسكٍ وعنبر وهبة الرحمان
نهر ماي ولـبـن فيها مـن الرحمان مـدراره=ونهرٍ من عسل صافي وخمرٍ ومابها عطشان
وحـور العـيـن يامـؤمـن كما الياقوت بأنواره=ألا ياقدرة الخالق جـمـالٍ يسـلـب الاذهان
وش أوصف لك عن الجنة وش اللي بس بختاره=كفاك إن مابها موتٍ يكدر عيشت الانسان
ألا ياباغي الجنة ,, في ثلث الليل واسحاره=تهجّد ,, واحفظ فروضك ترى عمر البنادم فان