** نبذه عن الشاعر :
سالم بن تويم بن جمعان بن مرزوق
بن عبدالله بن سعد الدواي
من اللمعان
من مواليد الدمنه (( السالميه )) سنة 1920م وسكن الشعبيه في حدود الثلاثينيات
وممن جاوره في تلك الفتره حزام الأذينه
إلى أن أتجه إلى حولي في سنة1950م
وبقى فيها حدود أربع سنوات تقريبا
إلى سنة 1954م سنة إنتقاله إلى الحصحص (( بنيد القار ))
والتي مكث فيها حدود الثلاث سنوات تقريبا
إلى سنة 1957م سنة إنتقاله إلى قرية البدع (جنوب السالمية) المجاوره للبحر
فسكنها إلى سنة 1967م سنة إنتقاله إلى السالمية (الدمنه سابقا)
والتي واصل مكثه فيها إلى سنة 1983م سنة انتقاله إلى منطقة سلوى مقر منزله الحالي
حتى توفاه الله تعالى في السبت 3-5-1997
وهو من عائله عانقت الشعر ابا عن جد
فالشعر كما يعرفه العرب وراثه أكثر منه موهبه
وخير الشعار من جمع الخصلتين الوراثه والموهبه كشاعرنا سالم بن تويم
يلقب شاعرنا بــــ(المسكت) لانه يفحم من يقابله من الشعار
إما فالطواريق الطويله الصعبه
او بالمعاني القويه الجميله التى يردع بها خصومه
** شاعرنا سالم بن تويم الدواي من شعراء الكويت البارزين ،
عرفته المجالس والدواوين والمناسبات ،
فذاع صيته وعلا قدره بين الشعراء هنا وفي الجزيرة
فعدته هوازن - العوازم - شاعرها المجلي
** قصائده :
(( 1 ))
الا يا الله يا ربي تعودي = رجاك العبد يا خير امعبودي
ترد الما الغدير ابموقعٍ له = تربينا عليه امن الجدودي
اشيوخٍ طبعهم حسن النوايا = ولهم شعبٍ بشوفتهم ودودي
وتجزى راعي السو ابشناته = ابفعلٍ ما يسويه اليهودي
نسى تسع السنين الي مضاً له = من الارزاق منا والنقودي
وعاهدنا ولا تم ابعهوده = وهجد بالليل والعالم رقودي
وذبح مسلمينٍ ما دروا به = يحسب انه بهالماقف صمودي
ترى ماقف رجاجيل الشهامه = اعلانٍ للسرايا والجرودي
على وضح النقى كلٍ يشوفه = رفع له بيرقٍ حدره عمودي
ولو هو ما يجي جو المعارك = يدهويهم واهو عنهم صدودي
يصير الطق في روس النشاما = ليا صادم فهودٍ في فهودي
ولو انه مسلمٍ يحضى بدينه = وقف يومه هجم عند الحدودي
وطالب له بحقٍ يدعي به = وشاف الي يجيه من الردودي
يعله فدوتٍ لخوان نوره = سندنا دايم الجيش السعودي
صديقٍ ما تجي منه الخيانه = مقر الجود ينبع منه جودي
ولاننسى الخليفه بالصداقه = وابن ثاني عساهم فالوجودي
ونعمٍ في فعول الشيخ زايد = والملك قابوس ترحيبه يزودي
ومصر وسوريا الجيش المدرب = سراياً قدمها القايد يقودي
وملوك المغرب الي ما تغبم = وشعب العرب معنا ومحشودي
يعرفون الكويت ابماقفٍ له = لها فعلٍ مشرف وامحمودي
وجميع المنتقص في كل ديره = معونتها لها العالم شهودي
عسى عيني تشوف الشيخ جابر = على تخت الحكم لا واسعودي
وولي العهد في صفه وربعه = عمى عين المنافق والحسودي
ويجمعنا على خير ومعزه = على ذيج الليالي واوجودي
(( 2 ))
صعدت أمس برجٍ مثل عالي جبالها = تهايفت له يوم أن عينى زمانها
رتلت في عال المبادى مثايلٍ = من خاطرٍ طرب لها يوم قالها
قدمت ما صمم ضميري وكونه = هواجيس بالي قدمت طرى لها
وانا هدف نفسي ورغبة ضميرها = سترٍ من اهل العرف ياجا مجالها
وندري بمرضى الناس يا ناس جايد = ما كل ما يرضي ضميري رضالها
جلال لامير الدار والشعب والوطن = وكل نفسٍ تنعرف من سؤالها
من دون مأمورٍ وامرٍ وداعىٍ = رجلى تعنى للمحطه الحالها
خدمة وطن حبٍ ورغبه لديرتي = الديره اللي ما ندور بدالها
ما اقول في بلدان الاجواد قصرةٍ = مير الكويت النا طويلٍ ظلالها
بلادنا اللي عايشين على ارضها = واجدادنا في قبورهم حدر جالها
كلامٍ اليا افتش عن اقصاه ينوجد = تثابيت تاريخ قليلٍ زلالها
يا الله يا اللي ترتجي الناس رحمتك = يا اللي رجى رحمتك كلٍ يسالها
يا مظهر الغرقان من غبة البحر = ومحيي انفوسٍ ما نوى الله زوالها
جعل الخريف وبارق الصيف والشتا = يسقي لنا دارٍ كبيرٍ جلالها
يصير فيها زاهر العشب يشبهه = مثاني بساتينٍ عدلها عدالها
ويجني الزبيدي في صحاصح حزومها = دارٍ يا عل الريف والعز فالها
دارٍ اليا جالها غريبٍ من العرب = من قل ما ياجد ابداره لجالها
يلقى بها منزل وعز وكرامةٍ = ويوفي بعض من يطلبونه حلالها
ما كان لاج بها يسمى من اهلها = ام حنونٍ ما تشتت عيالها
ليكنها عذرٍ طموحٍ عن الملا = ما كل من جاها يبيها ينالها
دار الكويت اللي على العز سيست = في وقتها هذا وماضي ليالها
يا علها بالفوز والعز تتصل = في جاه من ينشى سحايب خيالها
وختمت قولي في صلاة على النبي = عد البحور وعد مافي زلالها
(( 3 ))
اول بدى في مبتداي ابتدي به = ذكر الكريم اللي يربع بالامحال
اللي على خلقه عيونه رقيبه = سبحان من يجعل دجى الليل ينجال
اللي نفع ذا النون وقت المصيبه = يومه لقمه الحوت في بطنها قال
ناجاه في سود الظلام المريبه = وانجاه يوم انه لطيف بالاحوال
وبعد الذكر مبدأ المعاني نجيبه = ياجب علينا دون ناهي وعذال
من خاطرٍ طيبٍ ونفس لبيبه = واجب وطن ياجب على كل رجال
مبارك عيد الكويت الحبيبه = اللي لنا فيَ والاسلاف مدهال
من يوم سيف الكويت خالٍ شعيبه = واهله هله ما حل به كل حلال
يا ما جرى باطرافها من حريبه = بين الرجال اللي على شهب الاذيال
يومٍ جروا والمهار العريبه = تقفل وتقبل بالمشاكيل تجتال
كل ابلجٍ ما يصطبي للغليبه = راحت ضحايا الدار رجلي وخيال
حتى بحرها طاردوا في غبيبه = من خور عبد الله اليا أرض التهيَال
صانوا حدود الدار طيب وغصيبه = يا رحمة المولى على ذيك الاجيال
عاشوا عليها بالسنين الصعيبه = والشكر للي بدل الحال بالحال
واليوم كل الدار خضره خصيبه = من وين ما تنظر بساتين واشكال
دار الضعيف من العرب تعتني به = وتساند المنكوب بالمال والحال
من حدته جور السنين التعيبه = يلجأ ويلقى عند الاجواد منزال
ما بعدوا وناسٍ وناسٍ غريبه = يسايرون الشعب ماضيين الافعال
في ظل حكمٍ سعد من يلتجي به = حكمٍ على شعبه كما الغيث همال
حكمٍ حكم للشعب حكمٍ يثيبه = دستور حكم مساير الشعب عدال
كلَن على حقه يطالب طليبه = ما فيه فرق من وزير وعمال
واللي يخاف الله بعنز نصيبه = يجعل لها منزال في روس الاجبال
واللي يغطي النور ربي حسيبه = يحاسبه ربه لياحده الجال
من طاب طيب المودمي من حليبه = والا العقول ابها تكانه وجهال
كلن يعرفونه لميقاف طيبه = ويفضل الطيب بمقعد وفنجال
جعل الكويت اعيادها تهتني به = في جاه من نزَل تبارك والانفال
من شبتي لين الشعر كثر شيبه = داري عسى ما فيه نعتاض الابدال
وان غبت عنها سفرةٍ في مغيبه = بس اتسمع للأذاعة والارسال
احب داري حب عودٍ لصيبه = يا شفتها كل الهواجيس تنجال
والمبتدأ عند الختام أنتهى به = ذكر الله اللي خالق دق وجلال
(( 4 ))
يا الله يا اللي دبرة الناس بيديه = ما غيرك احدٍ نرتجيه ونساله
جزل العطا اللي ما يخيب مرتجيه = علام بالرحمة عظيم جلاله
جعل الكويت مبكر الوسم يزيه = في حسبة الخمسين مقدم لياليه
اليا فات خمس وخمس جعله يباديه = نوٍ من القبلة شديدٍ خياله
يخلَي المظما تسافح خباريه = ومن الحدود اليا جليب الجواله
دارٍ ربينا فيه وامواتنا فيه = الا ولا نرغب بلادٍ بداله
دارٍ اليا جاها الضعيف متنصيه = مفرقعه كثر الطلب والتجاله
اليا تم مده في الكويت وضواحيه = يشبع ويا صل عيلته من حلاله
مباركٍ فيه الولي يوم اهاليه = كلٍ من المسكين ينقل حماله
اليا جاهم اللي قاصرات مساعيه = لبى طلبه الكل لقاه باله
في ضف اميرٍ كل طيب يداريه = ومقدمٍ في كل دار جماله
قلبه يحب الشعب والشعب يغليه = بالعز جاعلهم معزة عياله
عساه بالدنيا وليه ينجيه = وبالآخره تحمي جنابه عماله
وصلاة ربي عد ذاري ذواريه = على الرسول اللي شريف مجاله
(( 5 ))
قبل امس في عالي المشاريف عديت = رجم زما ما بين حمر الحمادي
وامس الضحى من بين الافلاج مريت = طرقي ظهر من فرع وادي لوادي
ساعه على ذيك الطويله تعليت = عينت مخلوق فريغ الفؤادي
متوازيٍ وانا بهمه توازيت = معرفةٍ ومضيع الطير غادي
يقول تل وفز مني وفزيت = هذه على فيضه عراق وكدادي
واثريني بطلع الربيب استعزيت = طلعة خلوجٍ في روابٍ ابعادي
امجوعه يومين يوم اني اخطيت = في حسبة الستين بقران حادي
عقبه على ضافي السراويل غنيت = الاشقر اللي ما لجنسه ملادي
لكن في صدره من الودع خليت = خطٍ لبعض الناس فيه اعتقادي
راسه كما الفنجال والساق يا شيت = جبرٍ قصير مثل حرش الهوادي
من حين تكشف برقعه قلت هديت = من صفو وجهه بالعيون الحدادي
من قلة التسنيع للسبع فكيت = وقفا دقاق الريش جبر الثنادي
ساعة ضرب بالخد كبده تمنيت = لا ماه مير افخت طير الهدادي
لوحت بالملواح لينني ازريت = وانفدت من حمر القفوش الجدادي
عقبٍ على حروة مهده تمسيت = شبيت ضوٍ للخلاوي تنادي
في صدةٍ مني بغفله ولديت = لا مير اله رب المخاليق هادي
فزيت له من حب لينه وهليت = ترحيب احلى من لذيذ الرقادي
هادت هواجيس الضمير وتهنيت = جاني طرب قلبي ليال البرادي
(( 6 ))
نواف فوق الوكر ما احلى معانيه = مثل الشجاع اللي صموت سنافي
قرمٍ اليا كبرت مشاكل عوانيه = يجعل حمول الثقل عنهم خفافي
محلى عيونه يوم بالنسر يدعيه = عساه يسلم ما يجيه الخلافي
وليا نشر زين الموامي مواميه = يشدن من خوص الغروس الخوافي
غرسٍ على ايمن كفته الشط يسقيه = ما نش عنه الماء ليال الهيافي
سيف الجناح مفهقاته تناديه = منين ما درت النظر فيه وافي
ابيض عسى والي المقادير ينجيه = صافي اليا قالوا هل الصنف صافي
حر اليا برقت فالراس ويديه = يكفيك عن باق التواصيف كافي
حر اليا حطه على الكف راعيه = بأول دخول الوسم عقب الخرافي
الله واعلم يتعب اللي يباريه = يشوف شوف كايدٍ ما يشافي
وجهه يعيش بدون عيشه مواريه = ومقدم سراويله على الحجل ضافي
نواف فوق الوكر ما ازين معانيه = مثل الشجاع اللي سموتٍ سنافي
(( 7 ))
لا بله إلا قربت نقلة الطير = واهله من المربط بدوا ينقلونه
قاموا يشيلون الطيور الصقاقير = وصفن ليالٍ وقتهن يرتجونه
ايام ينشن المزون المزابير = غرن بومر الله تهشم مزونه
عساه في قدرة ولي المقادير = اليا تكاشف بارقه في ركونه
ينشي من المنشى وينوي المحادير = ويدهج عدودٍ بدونا يدهلونه
مدهال زينات البكار المغاتير = اللي فحلهن واحدٍ من نمونه
تلفى لهن في الخد ورد ومصادير = خدٍ يبيه البوش واهله يبونه
مضماه من خشم الوريبه ليا الصير = والايمن شوى ما تجهلونه
المحام في الديره ليال المخاضير = واليوم خشم طويق وسدير دونه
من عاشر البدوان ماهوب في خير = عزى لمسكين تفرق شطونه
ليا شرف النايف يجي به حواشير = وان رد حارت دمعته في عيونه
اكثر غرابيل المشق المظاهير = يا شاف سلفانٍ تطارخ ظعونه
هذي طبوع البدو من دورق عمير =اللي من الراشد تذكر لحونه
(( 8 ))
محلى مطاليعه الياتل منصور = من كف صقاره على راس مبيان
طلعٍ بعيدٍ ماله اوقار وحكور = دونه حدبةٍ مستطيله وجيان
كن المواتر حدر منصور طابور = والعج قافيهم تقل وصف دخان
قالوا بعضهم طلع هالطير مغرور = مهوب هذا طلع كذب وبهتان
يوم اتهموه وسهم اسهام بحدور = لينه تخيش بأيمن الروض حفان
حرٍ على طلعه يجي فيه حاشور = ما يلتفت له لو يصيح ابن سعران
مثل الشجاع اللي تكانه وممرور = صقاره مسلم وهو طير سلمان
(( 9 ))
لا تنشده حدد الميعاد = جاني من الصبر مكفاني
تسعين ليله طريح اوساد = وهذا من الرابع الثاني
ماشفتني والعرب رقاد = نومي على روس كيعاني
ماني على ضيقتي معتاد = ياالله بعزمك والايماني
متغربٍ من بلد لبلاد = ارجي شفا عالي الشاني
ان كان ربك لعبده راد = ترجع ليالي ابو جمعاني
وان كان وقف موسم الحصاد = اللي وطا الناس ياطاني
(( 10 ))
الصبح ماحلى شبوب النار = يا صرت مرتاح ومصلي
وحمست بنٍ من النيبار = تجلي الهواجيس وتسلي
صفره ومذعورةٍ ببهار = شف النشامى وشفٍ لي
يا طبت اشفي راعي الكار = يضحك احجاجه وينفلي
وياصار في جنبها بيطار = يفرح لياجيت ويهلي
والا الدهر بالعرب مرار =ياخذ من الناس ويخلي
فقير والا من التـجـار = العمــر ملحوق ومـولي
(( 11 ))
يا مل عينٍ من الهوجاس سهرانه = والموق عيا يهاب السهر ويعيفه
من العشا لين بان الصبح نيشانه = وأنا حمود اتهجع في سواليفه
ورعٍ خذاه الطبيب وصك بيبانه = موهوب في كيف ابوه ولاش في كيفه
يا الله يا اللي عظيمٍ فوقنا شانه = تفرج المنهو مريض الحال وضعيفه
وتفرح حشى اللي محل ابكاه وتنانه = يجحد عباريه عن بكية مواليفه
أطول البال قدم العود واخوانه = والا الحشا يطبخ الجاش وسراجيفه
يا مل عينٍ من الهاجوس سهرانه = والموق عيا يهاب السهر ويعيفه
(( 12 ))
روحوا لجابر يا محمد وشوفوه = وشلون حاله عقب ما غاب واليه
ان كان مرتاح بدنياه خلوه = عن دمعة امه ترتجي الله وترجيه
وان كان منضك من الوقت هاتوه = انا ذرى راسه عن الشمس عطنيه
ما عقب ابوه الناس غيري تولوه = يعوض في عم توفى ابن اخيه
دامٍ راسي حي خلوه وانسوه = وعقبي ترى ما منكم احد نوصيه
دامه صغير السن باروه باروه = لين الولي عن منة الناس يغنيه
واسمع ترى قطع بالارحام مكروه = توحيه في دستور الاسلام توحيه
اقول قول قبلي الناس قالوه = من لا يسرك حي لا عاد ترجيه
(( 13 ))
قالوا لي ان كان ترغب في سماعك كل طاروق = ترى الجماعه وعدهم من ورى صيهد بياني
عزمت اكرس جهودي واتسمع كل منطوق = لا شك لا شك ما طاع اهل الشف الزماني
لقيت لي ملعبٍ لعب اهله صافق ومصفوق = وكميت وارتحت عن بعض السوالف في مكاني
ان كان معني المثايل ما تشوق صاحب الشوق = لا خير لا خير في طعم الهليم مع السماني
اللعب له عادةٍ في الملعبه سابق ومسبوق = له معدنٍ بالضماير والمفاتيح اللساني
(( 14 ))
انا اشهد أن الرجال الطيبه تفرق على اللاش = قالوه ناسٍ وانا من ضمنهم شفت النمونه
ما تدرك المنصب العالي على راحتك ببلاش = خصن اليا صرت ما ترضى لنفسك بالمهونه
من لا يكظَم على الناجذ براس الناب ما عاش = ويزاحم اللي بدربه في الطريق يزاحمونه
اما بمالٍ تبذله قدم وجهك بذل وفراش = أو مثل يومٍ ابن جافور مسلبةٍ متونه
صبره لجور التعب بالهير وان صاروا على الطاش = يا خاف من زلةٍ فيها العرب يستنقدونه
(( 15 ))
اول بدا ذكر من يفرق حلاله من حرامه = سبحانه من كون العالم من الطين وكفلها
ياجب على كل شخصٍ فيه معروف وشهامه = نفسه تحافظ على ديرة مساقط رووس اهلها
يجعل علمها يمام العين يمشي في نظامه = ويعاكس النفس لو نفسه تعرَم في زعلها
يا صار محفوظ حقه ما على العاجل ملامه = ينجح ويمدح وتذكر كل نفسٍ في عملها
ياجب علينا كبير السن نمشي باحترامه = ونفسٍ تضيَع حقوق كبار اهلها من جهلها
(( 16 ))
الكبر لله يا الغضى معطي المال = ما عاد تعطي العلم كنك قريزي
ان كان شوفك بارقٍ له برجال = تراي ابلقى واحدٍ عنك ييزي
ما من طهامات ترى الحال بالحال = الفرق في جزل العطايا العزيزي
لا تحسبني يالغضي ضايق البال = نفسي تهقويني قوىٍ حزيزي
مير اشره عليك بكلمةٍ مثل من قال = كلمه تخلي الكل منا بريزي
(( 17 ))
عيت عيوني من عناها تهملج = يوم العرب هجاع يا قل نومي
من العشا لين أول الفجر ينبج = وتغيب من مقدم ضواه النجومي
امست تعاليل الضماير توهج = واصبحت اشرف في طويل الرجومي
وأعول كما تعول من الهجن مخلج = جوديةٍ قامت تحن وتعومي
شافت ولدها يوم يذبح ويهدج = ومن دونها وقف غلامٍ بشومي
تقاطعوه الكل منهم ضرب فج = وخلوا لها جلده ونشر الدمومي
وقامت على تالي البلايل تدهج = ومن حر ما تونس تطيح وتقومي
على عشيرٍ دونه الجال حجج = وعيا مقارب نجعهم لا يدومي
دونه سراب الجو الاقصى تمروج = غير النبي النايفه والحزومي
لا جيت قلبان عليهن تهرج = مهو بذاك اليوم عندي بيومي
اللي اليا قابل جبينه تبلج = تبلج النشمي بوجه معزومي
عشرٍ وبشر بالحجج يتخرج = الا ولا عاشر هدوس الرخومي
ولا قط عمره في حياته تسمج = مثل الاصيل اللي جموحٍ عزومي
ان كان عقبي زين الاطباع ماسج = النفس عن عشرات غيره تشومي
(( 18 ))
على لطيف الروح عرص بي الفال = قمت اتمنى ليتني كان ما جيت
يا حيس في ليت اريش العين ما قال = وإلا لقوله ليتني ما توحيت
يا شوق ويش علمك تغثبر علىالبال = في كلمةٍ لك قلتها يوم قفيت
حسيتني فيها وانا سالم الحسال = كان انت راعي تنَه ما تقاضيت
بالعون ما رجلي زلت من الجال = مير انت يا ضافي الدليقين زليت
من اولٍ يا شفت زولك بالأزوال = اقول لك من بد الأزوال حييت
واليوم زولٍ زال من عرض من زال = مع اوسط الازوال ما من تفاخيت
قلبٍ يحب من ابغضه كله هبال = واللي يعاد اللي مصافيه حلتيت
(( 19 ))
يا سعود انا في لذة النوم جاني = زولٍ غريب وجيته لي غريبه
ارتحت في شوفه وانا في مكاني = بالحلم ليت الحلم دايم يجيبه
واصبحت من دونه طويل البياني = وذيب يجر اعواه خالي شعيبه
انحاح طراد الهوى باللساني = والا على أهل العرف يا كثر غيبه
جا بيني وبينه امزوح ومعاني = قرّيت له بالغلب عين الربيبه
اللي ليا منه صفالك وزاني = يكفيك عن كل المخاليق طيبه
في خاطري من جور حبه حداني = لو هو على نفسي رضا بالغليبه
شبه الفتاه من النياق السماني = حايل ثلاث سنين ما شيف صيبه
وضحاً ليا ورد الدبش حندواني = ولا شرعت قدام قالوا مغيبه
ليا شافت الجويا وحسن الغواني = كمت على البريع وضحا حبيبه
(( 20 ))
اليوم عديت رجم او كير = من ضيقة الصدر عديته
جيته من اقصى الشعيب مغير = لين الحصى منه شديته
من الضحى لين رحت عصير = أذاني الرجم وأذيته
ما شفت من شوف راسه خير = فيه ازرق الدمع هليته
كلت عيوني من التفكير = واصويحبي ما تحليته
لو أهني باهني الطير = اللي يغرد على بيته
(( 21 ))
بالله ياهل الركاب اللي من المطراش ضمار = شدوا لي رسان سمحات اللحي وقتٍ قصيري
في مثل ما قال راعي السالفه مقدار مقدار = يرتاح منه الفؤاد وينجرد فيها النظيري
سلام للي عليه اشفق من الصايم اليا صار = ليصار في بارح الجوزاء وشاف الماء الغديري
في طاسةٍ باردٍ قدام وجهه حل الافطار = وهو على هفة القرطوع عطشان الضميري
شغله مع مقاولٍ والقيظ كنه واهج النار = من طلعت الشمس لين ان الفطر وقته يصيري
غريب دارٍ ولاله من يقول عليت وبحار = وهو يبي لزيته في الشغل محتاج فقيري
شارك ضميري ضميره عقب ما شدوا هل الدار = بالصاحب اللي صفالي وانكر الخلان غيري
وانا كذلك بعد عن عشرته مانيب مختار = دام النفس في يذري والقدم مني يسيري
ارجيه لو كان عني لددوه الناس بحيار = والله ما انسى رفيق الطيب والصاير يصيري
في مثل ما قال راعي السالفه مقدار مقدار = يرتاح منه الفؤاد وينجرد فيه النظيري
(( 22 ))
ياليتني في حفلة العيد ما جيت = جنبت عن نزلة هذيلا وذيلاك
والا بعد ما فيك بالعين لديت = صديت عن يمة يمومك وممشاك
وشفي ياسيد الرعابيب سويت = الله لا مني بالاحسان يجزاك
ماني بناسي وقفتك بايمن البيت = يوم انت ترفع لي سلامٍ بيمناك
سلام ياللي مالغيرك تمنيت = مشهات قلبي مير ويني ووياك
يا اللي علشانك عن العرس عييت = ارجي جليل الملك واصبر برجواك
يا شفت زولك دون غيرك تغانيت = العين تعجبها مثايل حلاياك
زد به اليا جيت بجدم واستعديت = وردت طراد الهوى حوض الادراك
يا وقف دوني ساقي الماء وذويت = بالخير ياسيد الرعابيب مناك
يا شفتني في النزل يا اقبلت واقفيت = مالي ترى حاجه وغرضان لولاك
انويك بالجيه واليا اقبلت صديت = من خوفةٍ بعض المخاليق تشناك
وقتي حداني عنك ما عنك سجيت = والا على وردك ظوامي و هلاك
ياواقف دوني ساجي الماء دويت = بالخير يا سيد الرعابيب مناك
(( 23 ))
البارحه يوم المخاليق هجاع = النوم عافنه عيوني عيافي
آصل إلى المكتب واعود بالاسراع = لين انسدحت من المسير متلافي
الشكر لله ما شكيت من الاوجاع = مير إن ما جاء بين الاضلاع كافي
على صديقٍ ناحروا عرق من ساع = والصبح ياما دونهم من سنافي
ودي بهم ومعكرش الراس ماطاع = لا تم سامي هالسبوع متعافي
راحوا لدارٍ علها وبل الارجاع = من المضامن والبحر والطفافي
دارٍ بها للجد والجند مرتاح = يعلها للسيل وسم وصيافي
يازين شوف الزمل يا ساح وانتاع = وينكسه جال الثمان الرهافي
البارحه يوم المخاليق هجاع = النوم عافنه عيوني عيافي
(( 24 ))
تجل مني يارهيف الثنيه = تجل مني ياريش العين وانت أص
واليا هرجت البينه والخفيه = ان كان في خاطرك شي قل وخص
ولا حدٍ خلط مثلك نجيحه ونيه = من اكل بالثنتين يا صاحبي غص
ياعين فدعا بالهدد صير ميه = شيهانةٍ مع من نقلها اتقنص
ومن مس حبله لو بتوته قويه = خطرٍ عليه ليها تكرب من القص
قومك كثيرينٍ وقومي شويه = منعت قومي يا الحبيب على النص
تجل مني يارهيف الثنيه = تجل مني ياريش العين وانت أص
(( ديوان الشاعر : سالم بن تويم الدواي )) رحمه الله
( تقرير عن مشاركة مخالفة ) ، و الموجودة أسفل كل مشاركة .