من البارحه وانا وبيت القصيد اعـراك.=انازعـه بأفكـاري وكنـه ينازعنـي
تحدرت في روضٍ نباته ماغير أشواك=عسا الله لا يقطـع رجايـه ويقطعنـي
عليك الرجا يامقلب الخلـق والافـلاك=.بذكرك عسا كل المسـاري تطاوعنـي
ياقلب العنا مامر بك فالزمـان اكفـاك=مع كل نبضة كل الاضـلاع توجعنـي
وصلنا نهايـة قمـة الفكـر والادراك.=ولا عاد تقـدر يازمانـي تزعزعنـي
يقولون ماينفعك نفعـه سـوا يمنـاك=وانا لي يمينن ساعة الضيـق تنفعنـي
الا ياحبيبـي كـل مامرنـي طـريـاك=علي بدع شعري كن طيفـك يشجعنـي
ليا جيت احاول في فؤاد العنـا ينسـاك=يلوعـه غـرامٍ ذكرياتـه تلوعـنـي
يعن بخيالي ضحك سنك وزين احكـاك=وأعن ألك وهجوس التوجـاد تدفعنـي
لك اشهور غايب ويل قلبي على لاماك=غيابك مسوى بي سوايـا ومجزعنـي
ماغير اترجى فالمقابيـل ويـن القـاك=وطال الرجا وابطيت يالصاحب المعنـي
تسلطنت في حبي من ادناك لين اقصاك=علّـي نـذر كنـك فالمحبـة تجمعنـي
ولا عاد تخفاك المشاعـر ولا يخفـاك=وداعـك هلاكـي والرجـا لاتودعنـي
وصالك حياتي واخذ عهد الوصال وهاك =فؤادي ونزعة خاطري وانت مقنعنـي
مساء الخير يالله جعلني ماشتكي فرقاك=صباح الوله جعل الزمن ما يخادعنـي