ودعتني من غير لا تعلن اسباب=ماتدري انها بحق مغليك تجريم
العين تضما بغيبتك والضما شاب=طال الغياب وشوفتك تقتل الضيم
لاني قدرت انسى ولا جابك اعتاب=لقمة غلا صارت عظم بالبلاعيم
على آمل في جيتك والامل خاب=وكثر الهقاوي ضيْعة بالمفاهيم
ان كان راكبْك الزعل للرضا باب=أشره وانا والله لأسد الملازيم
تعال عجل ما بقا فيني اعصاب=أرجع لعينٍ دمعها ماطر الغيم
أرضك عيوني والجفن دونك احجاب=مخفيك عن حسد العيون المعاديم
وأمعلمْك ان الهنا قرب الاحباب=مير انت خالفة الهوى والتعاليم
ماكنت احْسب لفعلتك هذي احساب=حطمت قلبي في سواياك تحطيم
عفيا عليك اتغيب ماتعلن اسباب=ماتدري انها بحق مغليك تجريم