الشوق لمواصلك مهما تصورته=اكبر من حدود تفكيرك وتصويرك
الحب كبرّك في عيني وكبرته=مايوصل اللي وصلته بالغلا غيرك
والخاطر اللي حصاة البعد كاسرته=عزى عليه الوفى في ظل تقصيرك
العام طاري غيابك ماتكابرته=واليوم جرة على شوقي مزاميرك
دمٍ نزف من جروحي ماتخاسرته=وماكنت ابي من جفاك الا معاذيرك
وسّعت صدري على الفرقا وصبرته=مادام درب الغياب اول مشاويرك
مشيت دربك ولا فكرت بأخرته=احاول افهم مقاصيدك وتفكيرك
والا الجفا لو تحزمت وتحذرته=مايمنعك عنّه تحزيمك وتحذيرك
ولو تعرف اللي عباة الوقت ساترته=مافاجاءتّك الليالي في مقاديرك