** قصائد الشاعر :
(( 1 ))
الموت حق وكل نفس تذوقه=مير البلا من شاف موته ولا مات
من واحدٍ قلب المعنا يسوقه=بدل ليالينا الهنيه بونات
وشفيه عرضني مهالك طروقه=وانا تحملت الخطا منه مرات
لو هزت اشواقٍ بقلبي خفوقه=ماكان تسهر عيني وعينه تبات
لي دمعةٍ لامن ذكرته سبوقه=تهمل ويقفاها من العين عبرات
بعنا وشرينا لا ربحنا بسوقه=ولاني بحاسب ربحها والخسارات
اوفيتله ماكان له من حقوقه=وهذا ولي عنده حقوقٍ قديمات
ما ارتجي غيمٍ تكاشف بروقه=لاهبت رياح الشمال القويات
ولابه قوي الا واقو منه فوقه=والعمر لو طالت لياليه لحظات
يالله عسى ذيك المخايل صدوقه=وترجع لنا زملٍ بعيد المسافات
(( 2 ))
ياشوق لو انك عن الحال تدري = وتشوف حال اللي هواكم براها
ياشوق دمعي فوق الاوجان يجري = وكثر البكا هدد عيوني يعماها
ياشوق يكفي كني العود مبري = وش لك بحالٍ ياإسن من رجاها
ياشوق وش ينفع صدودك وهجري = وانت ابعد عليّ من النجوم بسماها
وجدي عليك ياشوق واطول صبري = وجد الذي ماتوا بيومٍ ضناها
وجد الذي من قبل يحجى ويذري = دارت به الدنيا وضامه شقاها
وجد الذي من عقب ماهوب مثري = قام يتعطى لابته وقرباها
ياكثر عبراتٍ تكسر بصدري = إليا انقضت هذيك هذي وراها
جرحتني ياشوق والجرح خطري = وجروح قلبي مالقينا دواها
خاشرتني ياشوق حتى بعمري = قربك سعد روحي وغاية هواها
جبرتني يامشعل القلب جبري = حتى عيوني لو بكت ماكفاها
اتركني اسعد لو ثواني بعمري = يكفي علي دنياي دارت رحاها
(( 3 ))
يضيق صدري كل ماجيك زعلان = وتضحك لي الدنيا إرضيتوا علينا
ياما نجي نستسمحك وانت غلطان = ليتك إليا منا زعلنا تجينا
وش الذي غيرك ياخدر الاعيان = وش السبب يومك تكبر علينا
نسيت يومنا حبايب وخلان = كان انت ناسي حبنا مانسينا
راع الوفا يازين يجزى بالاحسان = وهذي سلوم الناس في كل حينا
حطيت لك بالقلب يازين مسكان = وياما شربنا من الهموم وروينا
واليوم لك شانك وحنا لنا شان = ولاتصدق اللي قال منك بكينا
(( 4 ))
عزاه ياعينٍ تزايد بكاها = على قبر خلٍ توده وتغليه
مالوم عيني لو تزايد شقاها = الله من غالٍ تحبه دفن فيه
ذكرت وقتٍ فايتٍ من غلاها = ولااحدٍ يلوم العين لو كان تبكيه
طرالها عصرٍ تقضي معاها = لو كان ميت قامت الروح تدعيه
ليته نظر حالٍ فراقه براها = ولا نظر عبرات عينٍ تناجيه
عزاه من همٍ بروحي طواها = عجزت اكنه بين الاضلاع واخفيه
يا الله يارافع مباني سماها = ياواحدٍ كل المخاليق ترجيه
تجبر عزى نفسٍ تزايد عناها = وتعوض قلبٍ منفجع عقب غاليه
(( 5 ))
ياعين لو كان البكا يرد غالي = طول العمر والله لخليك تبكين
واني لنوح ولسهرك بالليالي = لين انك تهلين دمعٍ تخزنين
على الذي ياعين اقفى بحالي = ومايرجعه كثر البكا لوك تبكين
راح ومكانه داخل القلب خالي = ولاعاد ظني غيره احدن تحبين
ذكراه صوره خالده في خيالي = ماتمحى صورة حبيبن تودين
اول ان جيته حبيبي عنالي = واليوم عنه لي زمانين ياعين
ويلي على لاما وليفٍ غدالي = ابكي على لاماه والناس ممسين
كثر البكا ياعين ما رد غالي = لاشك كفي عبرتك لا تهلين
(( 6 ))
مرحوم ياواحدن بالحلم لاقيته = اللي عن العين غايب له زمانيني
واجهت في مرقدي خلي وناديته = وجاني على عادته يضحك نظر عيني
فزيت من مرقدي عجلن وظفيته = وهلت دموعي على خدي تعزيني
سمعت قولٍ ألا ياليت ماوحيته = يقول ربي حسيبك كان ناسيني
مفات يومن حشى من راح ماطريته = وتكثر طواريه لاجا الليل ليليني
ياكثر دمعن عقب فراقاك هليته = يشهد علي الولي ياكامل الزيني
كم من عذابٍ عقب فرقاك قاسيته = من عقبكم ما لقيت اللي يواسيني
ياما ودمعي على خدي تمنيته = مرحوم ياواحدن كم كان يغليني
من غير ماوادع المجمول خليته = في لحظةٍ محزنه فارق نظر عيني
(( 7 ))
ياشوق من دونك ظروفٍ حدني = وانت الذي مالك بديلٍ مع الناس
ماقرّبك كثر البكا والتمني = وحبك بقلبي يا الغضي ماله قياس
العام في قربك ياشوق متهني = واليوم لا والله علينا القدر داس
حكم القدر خيب ظنونك وظني = وحط بحشا قلبي مع الهم هوجاس
هموم قلبي يا الغضي نازعني = وعقب الهنا قلبي من الهم محتاس
سود الليالي من عناهن سقني = همٍ يحط بكامل العقل وسواس
ليت الليالي بسرهن صارحني = او ليت الليالي بيننا كلها اوناس
سود الليالي اضحكني ورمني = واخذت في بحر الهواجيس مرواس
ايام هجرك بالهوى لوعني = وقلبي عقب فرقاك بالهم غطاس
من عظم جرحٍ بالحشى مستكني = عروق قلبي يا اريش العين يباس
سود العيون بسهمهن صوبني = جل الذي سواك يا عدم الاجناس
ياما عيونك باللقا واعدني = وياما سقني من عنا الحب بالكاس
وياما عيوني من جروحك بكني = ظلمتني يا الترف واقول لاباس
امانتك لاتقطع الوصل عني = لو طالت الدنيا ترى الناس للناس
(( 8 ))
أعاهدك باللي فرض حجة البيت = مجفاك لو قبري يشيد ترابه
جاني خيالك في منامي وفزيت = وهلت دموعي مثل وبل السحابه
ياما على شوفة خيالك تمنيت = عزاه من جرحٍ بقلبي لجابه
وياما من هموم المحبه ترويت = والقلب زاد من الهموم إلتهابه
وياما وياما من جروحك تداويت = لاشك جرحك مايفيد الدوا به
وياما وياما بعالي الصوت ونيت = على الذي ماعاد يبري صوابه
ماينفع المجروح كثر التناهيت =جرح الهوى ياويل قلبٍ لجابه
كم من جروحٍ بالهوى منك عانيت = وجرحك بقلبي كل شخصٍ درابه
أفرح ويطرب خاطري كل ماجيت = وقلبٍ تولع فيك لا واعذابه
قالوا تمن قلت ياليت ياليت = ألحق هوى اللي تل قلبي وغدا به
في مرقدي كني ندهتك وصديت = ارحم جريحٍ صاح من حر مابه
وجرحي خطيرٍ مير كاني توفيت = أمانتك قبري تزاور ترابه
(( 9 ))
لي حبيبٍ شوفته تصعب عليه = يا (( بدر )) ياخوي بلغهم سلامي
اتمنى شوفته وأبغى مجيه = مير اخاف الناس تِلحقها ملامي
لو زهتني غيرها مالي بغيه = وارده قلبي مثل ورد الضوامي
شايفٍ بعيونها جروحٍ خفيه = والعيون اللي رمتني بالمرامي
شكلها ولبسها لبس حضريه = والبداوه فيه حتى بالكلامي
نوبةٍ اتجيك في زين ابدويه = ونوبةٍ ترمي العباه مع اللثامي
لامشى مثل الحمام الراعبيه = شاركت في مشيها حتى الحمامي
(( 10 ))
أقسمت لك بالله ودين بثر دين = وعهدٍ علي وبالنبي والصحابه
وبحق آياتٍ تلوها المصلين = وبحق بيتٍ ذاكره في كتابه
منساك مادمنا على الارض حيين = وغلاك في قلبي غرس كل نابه
تشهد على حبك دموعٍ من العين = هلت على خدي سوات السحابه
ويشهد علي ليلٍ به الناس غافين = اسهر مع نجومه واقاسي عذابه
وجرحٍ بقلبي منك ماله مداوين = جرحك لجا بالقلب واحكم صوابه
ولو ان جرحك جربوه المحبين = يصد عن درب الهوى من مشابه
وياصاحبي لو للمحبه سلاطين = لصيح باعلى الصوت قلبي غدابه
واشكي واقول اهل المحبه مساكين = من ينصف المجروح مما لجابه
هذا اعترافي للغضي كامل الزين = اللي نهب عقلي ولا احدٍ درابه
(( 11 ))
صوت وصدى بين الشاعرين :
( سالم حزمي زبن الميع )
+
( مسلم البحيري )
الصوت للشاعر : ( سالم حزمي زبن اللميع )
البارحة فكري غدا فيه وشواش = من واحدٍ حبه يحش الحشى حش
عقب الغلا صار اريش العين غشاش = الله يعاقب يالبحيري هل الغش
عروق قلبي اليوم عقبه عطاش = والدمع من عيني سوات المطر طش
طاع العدو خلي سمع هرجة الواش = وعزي لقلبٍ في هواها تبلش
لو هم قلبي ينقله حي ما عاش = ولو هم قلبي ينشكي للبحر نش
اتعبت نفسي يالبحيري على ماش = ولا حصل شي يطرب وينعش
غير هوانا كل عاذل وحشاش= يحميك منهم ربنا والي العرش
راعي الحسد عن السر فتاش = ويرتاح لامنه بعرض العرب حش
يابوحميّد كيف عقبه بنعتاش = كيف اتصرب والقضي بالهوى غش
الصدى من الشاعر :
( مسلم البحيري )
يامرحبا في خط من هيض الجاش = وخلا ضميري بالتماثيل ينبش
واخذت لي في بحر الامثال مطراش = ولولاك يا سالم فلا فيه نطرش
باهديك كلماتٍ كما الدر وقماش = ولا عاد فينا يابن حزمي تحرش
ان كان قلبك صاملٍ مابه دغاش = اسمع كلامي وافعله بالذي غش
وخلاك مهمومٍ بالافكار منداش = كن العقل في راسكم يافتى نش
من باعكم بالرخص بيعوه ببلاش = هذا جزا من غش ثم احرق العش
تلقى عوض من غش مكحول الارماش = غروٍ حسين اطباع مير انت فتش
اوصيك بالممدوح عن رفقة اللاش = لوهو على دربك لك الزل يفرش
اياك تبعد يابن حزمي عن الطاش = ماكل بحرٍ يافتى الجود يندش
وترى الهوى مثل البحر ماله اقياش = ومن لا يحسّب للعواصف تفلش
ديوان الشاعر : (( سالم حزمي زبن اللميع ))
( تقرير عن مشاركة مخالفة ) ، و الموجودة أسفل كل مشاركة .