بسم الله الرحمن الرحيم
تحية طيبه مباركه
يسرني ان اقدم لكم بعضاً من قصائد الشاعر الكبير/ محمد بن سعد الجنوبي شاعر الكلمة العذبه والاحساس المرهف والذي خدم الفن الشعبي منذ سنوات عديده وما زال وها انا اكتب بعضاً منها وكون ما تم نقله من ديوانه فقد يكون هناك ابيات محذوفه بسبب عدم الموافقه عليها من قبل الجهات المعنيه والتي لا تخفى على الجميع وقد تكون هناك اغلاط املائيه أرجو المعذرة في ذلك ولكم اطيب تحياتي ونستهلها بهذه القصيدة/
ياناس حالي راح من غير مصلوح
وقد ابدع الفنان الكبير/ طاهر بن علي الاحسائي وقدمها باسلوبه الجميل
ياناس حالي راح من غير مصلوح= الله يرحم حالتك يا الجنوبي
كل العرب تمسي وانا ليلي انوح= عز الله سمر البنات العبوا بي
خصوص اللي كامل الزين مملوح =اللي بروا حالي وهم ما دروبي
ذي حالتي وهو يجي يوم ويروح= ولو ينقطع يومين شقيت ثوبي
ابو جديلٍ فوق متنينه يلوح=مثل العذوق اللي ضربها الهبوبي
الخد مثل الورد والبطن ممسوح= والجسم سالم من جميع العيوبي
عذبتني بالصد يا خفيف الروح= وخليتني في وسط الاسواق اهوبي
عليك قلبي يا بعد روحي يفوح=وكان طولت جفواك خطرٍ يذوبي
انام في ليوان والناس في سطوح= يا ويل قلبي من حبيبٍ كذوبي
ليته يسامحني وانا اقول مسموح=يرحم حياتي ويرجع القلب صوبي
كلمات شدا بها الفنان الراحل / بشير حمد شنان , والفنان الراحل / عيسى بن علي الاحسائي .
يازين سامحني إلى قلت مرخــــوص = وإذا بدالك حـــــاجةٍ مستعديـــــــن
بحر الشراكه يا حلو فيه ما اغــــوص = وثوب النفر ما يمتكن يكسي اثنين
نوم الحزم من غير دوشق وبرنــــوص = اخير من نومة سرير الشــريكيــــن
كل شيٍ توضح لي ولا يمكن تلــوص = معقول اكذب بعد ما شفت بالعيــن
اختار اسكن في عريشٍ من الخــوص = احب من قصرٍ أصحابه كثيريـــــــن
تقدر تقول اته حصل مني نقـــــــوص = ادخل بحجه وخلنا مستريحيــــــــن
قلي وأبو سيفين في البوك مرصوص = أقوم لجلك لو تحملت بالديــــــــــن
الرجل ما يامن وفي بيته الصــــــوص = وانا معاد آمنك خلاص يا زيــــــــن
الماي قدامي
التي هي قريبة من قلب الفنان الكبير/ عيسى بن علي الاحسائي والتي بالكاد ماتمر من حفلة الا وتغنى بها
الماي قدامي وانا ظميان=معقول اشوف الماي ولا اطوله
اللي على الماء كلهم عدوان= حطوا حرس لحدٍ يجي حوله
كيف العمل في الماي ياحمدان=شف لي طريقة حل معقوله
إن ما وردته ورحت أنا رويان= والا حياتي جات مجهوله
والله لو دونه جميع إنسان =لشرب وأبرد كبد مغلوله
اخاف اموت وضامري عطشان= وذا الماي أنا ملزوم بوصوله
عيبٍ على اللي ينثني خسران= عمرٍ بليا حظ وشهوله
اما مع اهل الماء نصير اخوان = والكل فينا ينسمع قوله
والا يقوم الحرب في الميدان=وكل واحد يرجع بمحصوله
حسبي على سايق الستين
هذه الكلمات هي من اوائل ما تغنى به الفنان الراحل/ عيسى بن علي الاحسائي
حسبي على سايق الستين = فرق محبٍ من احبابه
اقفى بخلي كحيل العين = حسيبه الله وش جابه
صوت يا ناس راح الزين=اللي خذ القلب واقفا به
قالوا لي ان توهم ماشين=والقفل الاصفر على بابه
قلت اسعفوني بقلن بانزين=بشب في الفورد واصحابه
والا يرده عليّ ذا الحين=اجلس معه واتمشى به
ابو جديل على الكتفين=بالمسك الاصلي يغذا به
مقدر على غيبته يومين=ما ينشرح خاطري إلا به
الموتر اللي
وهذه القصيدة قدمها الفنان الكبير/ عايد عبد الله وهي لا تخفى على الجميع
الموتر اللي مرني بالليل = بعد العشاء يمشي على هونه
في شارع الثقبه سقاه السيل=من مصنعه توه يمشونه
فيه الحلا والزين بالتكميل= ياليتني قايد دركسونه
لامن مشينا مع طلوع اسهيل=ومراية الطبلون موزونه
على الذي خده كما القنديل=ياواهني منهم يعرفونه
العين داعجها بحد الميل=تسلب عقول اللي يشوفونه
يابوجديلٍ لفه المنديل =بالعنبر الغالي يغذونه
حبك سبا قلبي وزاده ويل=من عطفكم تسمح تداوونه
بشكي عليك الحال يابن شعيل=ترى سبب حالي تعرفونه
كلٍ نهار العيد
قدمها الفنان الكبير/طاهر بن علي الاحسائي
كلٍ نهار العيد عايد حبيبه=والتم شمل اهل القلوب المواليف
وانا حبيبي غايب الله يجيبه= ياحسرتي ان كان انتهى العيد ماشيف
مصيبتي يا كبرها من مصيبه=لا شفت غيري في اناسه وتكييف
فرقى الاحبه يا جماعه صعيبه= تالي العهد بصويحبي العام في الصيف
ياوين اشوف اللي اوصافه عجيبه=ودي اشوفه لو لحقني تكاليف
يارب قلبي منه يبرأ لهيبه=وبمشاهده يا ناس يستانس الكيف
جعله نصيب لي وانا من نصيبه=هذا منى قلبي ومن غيره امعيف
المستريح اللي حبيبه قريبه= ماهوب مثلي عيشته بالتكاليف
من لامني في الزين ربي حسيبه= تلوم قلبي في مليح التواصيف
كف العذل نا اطيع ماهي غصيبه=ماتدري ان راعي الهوى قلبه اصخيف
قال الجنوبي تمهل
قال الجنوبي تمهل حاكني يازين=سلم ولو بالاشارة لا تعداني
من يوم شفتك ودمعي حاير بالعين = عذبتني يابعد روحي وحياني
والله لو خيروني في عدن والصين=وعمان والهند وامريكا ولبناني
ايضاً ودار العجم مع بندر البحرين=يحرم على القلب يعشق واحد ثاني
هذا هو خاطري من يومنا طفلين= كم ليلة باتها ساهر على شاني
ابو ثلاث وخمسة واربعه واثنين= توه على غاية المطلوب فتاني
الراس اشقر وخمري كاسي الكتفين= يغذا بعنبر ومسك اصلي وريحاني
والخشم خنجر يماني قاطع الحدين=ومبيسم داخله لولو ومرجاني
انا صابر
انا صابر واظن صبر المحب شين=سبايب غزالٍ حط بالقلب نيشاني
ترى اول عذابي يوم عرض كحيل العين=وثاني عذابي يوم وقف وحاكاني
وثالث عذابي شوفتي ناعس الطرفين=ورابع عذابي يوم قفى وخلاني
وخامس عذابي يوم قلت الوعد يازين=وسادس عذابي يوم يوعد ولا جاني
وسابع عذابي قلبي اللي غدا نصين=وثامن عذابي خايفٍ منه ينساني
وتاسع عذابي دمعي اللي على الخدين=وعاشر عذابيلا شمتوا في عدواني
هذا ما جرا من الحب في حالة المسكين=عسى الله يبلى من بحبه تبلاني
برد الرسايل
برد الرسايل يا حياتي عليّ شحيت=عسى ما حصل ما كدرك يا نظر عيني
اروح البريد بعزم والمشكلة لا جيت=اسحب ارجيلي والهواجيس تطويني
انا ماخبرت ولا اذكر اني عليك اخطيت=بليا سبايب ياهوى البال ناسيني
إذا كان مني يامنى خاطري مليت=من الخط ياسيد المها لا تخليني
انا كل ماتطري عليّ صورتك ونيت=مالي حيلة الا الدمع وافرك ايديني
مع الناس اسبح وعلتي لا دخلت البيت=اعاف الكلام ولا ابغى احد يحاكيني
والله لو قالوا
والله لو قالوا انسه ماستطيع انساه=ياكيف ابنساه وروحي فيه مرهونه
تطري عليه ليالي عشتها وياه=قدام لاهم عن اعيوني يخشونه
بيته قريبٍ ولكن ما قدرت انصاه=واهو بعد عن مجي بيتي يمنعونه
يا ويل قلبي عليه ومقصدي ملاماه=ابسأل الله عسى شوري يطيعونه
عزي لحالي ويا ويلي عقب فرقاه=مسكين منهو سواتي غاب مظنونه
البارحة ساهرٍ
البارحة ساهرٍ والنوم ما جاني= والدمع من فوق خدي عزتاليه
والقلب ولع كما لمبات ظهراني=لي ولعوها صلاة العصر كوليه
على الذي لا تمايل عود ريحاني =والعين سوداء تشادي عين لدميه
ابو ثمانٍ تشادي حب رماني=بيضٍ رهاف بعود الراك مجليه
يابو خدودٍ كما تفاح لبناني=حمرٍنظيفة وفيها الخال ماريه
يا كيف ولعتني واليوم تنساني=رح في طريقك عسى الله يرجعك ليه
خلك بعقلك ترى ذا الناس عدواني=ومن طاوع الناس جات عينه شقاويه
يامن يسلم لي
وقد قدمه الفنان الراحل/ عيسى الاحسائي
يامن يسلم لي على أعز الاصحاب=اللي هجرني وراح غصبٍ عليّه
اقفى وخلاني تحت صاير الباب=امسح دموع العين وأفرك بيديّه
ليش الجفا والهجر يا عذب الانياب=نسيتني كني مسوي خطيّه
إن كان يا سيد العرب خاطرك طاب=عن عشرتي راحت حياتي ضحيّه
حبك في وسط القلب ركز له اطناب=ما ينمحي لو زرت حوض المنيّه
البارحه سهران لين القمر غاب=تطري عليّ أيام كنا سويّه
ايام كنا يابعد روحي أحباب= والكل منا ما يفارق خويّه
طاوعت بي ياصاحبي هرج كذاب=وخليت في قلبي جروحٍ خفيّه
الحب بلوى وكل شيء له اسباب=وأسباب مابي حب جالي الثنيّه
لا تتصل بي
لا تتصل بي خطي اليوم مشغول=دور على غيري عسى الله يعينك
لا تتصل مشغول خطي على طول=حتى الرقم باغيره لاجل عينك
بحط لي رقمٍ عن الناس مجهول=خلاص كف الهرج بيني وبينك
لا تقول لي شنهي السبايب ولا اقول= كانك ذكي حلل كلامي بحينك
اول تقول الكذب واقول معقول= يومٍ قلبي لعبة في يمينك
غريتني بهرجٍ من شفاك معسول=وأصدقك ما أرضى بشيء يهينك
واليوم كل خيانتك جات باصول= قريت ما خبيت لي في جبينك
حجر عينه
كن في حجر عينه عسكر مستعده=واعذاب الجنوبي دايم له يحاتي
من سعى بيننا بالهرج لا رحم جده=كيف يسعى مابين اهل الهوى بالشتاتي
ليتني وردةٍ ياناس من فوق خده=اتلذذ بقرب الزين حلو الشفاتي
ولو يبي جيتي ما أظن أحدٍ يرده=مير قصده يعذبني وينوي شتاتي
الايا الله
قدمها الفنان الراحل/ عيسى بن علي الاحسائي
الا يا الله ياعالم بحالي=الهي طالبك حلمك عليه
ابات الليل من شيء جرالي=نحيل الحال وعيوني شقيه
اطباء المملكة شرق وشمالي= محد منهم عرف وش صار ليه
احتاروا كلهم محدٍ سعى لي=ولا فادت اداوي الصيدليه
على اللي لا تمشى باعتدالي=ودخل في العصر سوق القيصريه
حبيب الروح لا عن وطرالي=اعاف النوم من يطري عليه
الا يا اهل الهوى
وهذي كذلك قدمها الفنان الراحل/ عيسى الاحسائي
الا يا اهل الهوى قلبي تفتت= ومن كان السبايب ما درى بي
على اللي بشارع الخباز مرت= عنود توها بعز الشبابي
في موتر بنز لوحاته مؤقت=على سيت الوراء لا وعذابي
بعد ما شفتها قمت اتلفت=بغيت لو لا الحياء اشقق ثيابي
انتبهت لي اطالعها وتغطت=وخلت ظامري فيه التهابي
الا وحسرتي لما تمشت=تهز اردافها تبغي عذابي
وقفت انظر لمشيتها وصدت=وصابتني لاشك اخفي صوابي
بغيت اصبر لكن العين هلت=دموع مثل هطال السحابي
قالوا هلي
قالوا هلي لك خمسة أيام زعلان = تونس مرض قلت المرض تجهلونه
أونس بداخل مهجة القلب نيران = وأسبابه اللي يوم جاء تطردونه
قالوا ترى عقلك بدا فيه نقصان = بنعالجك قلت أعملوا ما تبونه
جابوا إسعاف وقالوا ودوه ظهران = يمكن مستشفى أرامكو يعالجونه
جاني الطبيب وقال وش فيك يا فلان = قلت أنشد اللي مقصدي يفهمونه
قال لهلي معالجي فيه خسران = ومظن أطباء المانيا ينفعونه
باين عليه إنه مولع وحيران = والحب بلوى للذي يدخلونه
قلت أشهد أن قلبي يا دكتور وجعان = ودواي أعرفه شوف داعج عيونه
قال صح كلامه حق ما هوب غلطان = هاتوا وليفه كان بتساعدونه
قالوا تزوج ( اجتماعية )
قالوا تزوج قلت ما نيب بمجنون=العرس للي يملكون الملايين
اللي رصيده داخل البنك مليون=يحق له في اسبوعه يحط عرسين
والا الذي من فوق راتبه مديون=وش ينبغى به ذاك شينٍ وقوي عين
راحو اهل المعروف واللي يعرفون=ما فرقوا بين الغني والفقيرين
في بنيهم ما يشترون ويبيعون=لا جاء لهم الرجل الكفو راعي الدين
والا الردي لو يملك اموال قارون=ما همهم ماله واهم عنه دارين
واليوم بعض الناس في المال مفتون=معك دراهم لو تبي العرس ذا الحين
ما فكروا في الناس مهما يقولون=ابليس مغويهم وصاروا شياطين
كلن برد قلبه
كلن برد قلبه وهانت بلاويه= الا الجنوبي ما تسهل مراده
قلبي عليل وضايعه حيلتي فيه=يا الله دخيلك من حياة القراده
((محمود ندا)) ما فاد قلبي اداويه=عشرين يوم اراجعه في العياده
ادواي عند اللي عسى الله يخليه=اللي نحل حالي وبالهجر زاده
ليته يطريني مثل ما اطريه=تطري له ايام الهنا والسعاده
لاشك ناسيني ولاني بناسيه=مهما خذ الهجران والصد عاده
وان باعني برخيص مازلت شاريه=وغيره فلا والله لي فيه راده
حبه بوسط القلب متمسك فيه=ما ينمحي مهما يطول ابتعاده
يا عاذلي في الصاحب اللي مغاليه=كف العذل مالك من العذل افاده
تلومني في اللي الى حل طاريه= يروح ليلي مهتني في رقاده
مقهور يا صاحبي مقهور
مما قدمه الفنان الراحل/ بشير حمد شنان
مقهور يا صاحبي مقهور=واللي شبكني يخلصني
عز الله إني معك مجبور=وباسبابك الحب لوعني
راعي الهوى لو ضحك مخطور=كذاب لو قال متهني
جرحي تصعب على الدكتور=حتى المطوع تعذزني
شف حالتي ياقمر عاشور= مدري متى الله بيرحمني
من شافني قال ذا مسحور=والله علم ويش صايبني
دايم وانا خاطري مكسور= تراك يازين ظالمني
صدقت فيني كلام الزور=وخيبت ياصاحبي ظني
قالوا علامك
وهذه القصيدة قدمها الفنان الراحل بشير حمد شنان
قالوا علامك يا الجنوبي توسوس=حالك نحل وكثرت الشعر زاده
إذا تطيع الشور عزم واعرس=قلت اتركوني مالي في العرس راده
انا بغناة الله ولا ني بمفلس=لا شك كل واحد يدور امراده
إذا بغيتوا لي المعزه مع الانس=وتبغوني اعيش عيشة سعاده
جيبوا لي اللي في عذابي تجنس= اللي شواني مثل شوي (الجراده)
ابو جديل يرفعه يوم يجلس=ولا جا ينام يصفطه له وساده
والعين لا سلهم بها قلت ينعس=عنده على زين المعاني شهاده
بعطي هله عشرة معضد ونقلس=وحاضر إذا يبغون مني زياده
يمكن هله وياي شينين الانفس=ماخذين لي الاعذار والكذب عاده
لجيت اكلمهم يقولون ادرس=وان طاولت الاعذار ما فيني افاده
ترى اول عذابي
هذه الكلمات قدمها الفنان الكبير/ مطلق دخيل
ترى أول عذابي يوم قالوا حبيبـك راح= ركب في القطار ولا تصرف يوادعنـي
وصلت المحطة وأحسب انه كلام مـزاح= وزاد العنـا بـي يـوم شفتـه يطالعنـي
يأشر بكفه لـي يقـول الهـوى فضـاح= تحمل تـرى المذكـور عنـدي يراقبنـي
بغيت اتجمل واكتـم السـر لكـن بـاح= وقلت الرجـا ياسايـق الريـل ركبنـي
تراني عقب فرقى الغضي ما قويت أرتاح= خطيرٍ عقـب فرقـاه روحـي تفارقنـي
وزاد الشقى بالقلب يـوم المنبـه صـاح= ووقـف مـع الطاقـه حبيبـي يكلمنـي
خزرني بعينٍ كن فيهـا سلال ارمـاح= وفريت وجهي خايف الدمـع يفضحنـي
عقب ما قطعت الياس زادي بي الاجراح= ورفعت صوتي واحسب الزين يسمعنـي
رجعـت لمحلـي أتذكـر زمـانٍ راح= مع الصاحب اللي يوم الاثنيـن فارقنـي
ليالي مضت لي كل ابوها ليالـي مـلاح= ابطلب عسى الله مع هوى البال يجمعنـي
ياسيدي في الحال
يا سيدي بالحال رد النظر = وأرحم محبٍ حياته بين ايديك
إلى متى يا زين وأنا أنتظر = صبري قضى والأمر منك وإليك
أظن ما فيه أحد مثلي صبر =راحت حياتي وقلبي يرتجيك
الناس طلعت على سطح القمر = وأنا معك ما قدرت أوصل إليك
معاد باقي عليّ إلا أنتحر = وأموت لجلك حسبي الله عليك
الموت أحسن من حياة القهر = ما دامك إنسان عايف من يبيك
تراني واصل على حد الخطر = لا تبيع واحد بروحه مشتريك
ماني بداري متى أنا بنتصر=واشفي فؤادي منك غصبٍ عليك
في سنة الله ياسيد السمر=يا زين قلي متى الله بيهديك
ياراعي التكسي
ياراعي التكسي شلني واكسب المعروف= والحقني باللي نهب عقلي وخلاني
اللي رمتني بعينٍ كن فيها سيوف=اقفت وانا دمعتي تجري على اوجاني
مدري من اهل الطرف والا من الهفوف= والا من اهل المبرز قرة اعياني
مشيت قلبي معك يا بوحشى ملهوف=واتركتني يا حياة الروح وجعاني
ليتك تجمل معي ولا تردني مكسوف=وتشمت الناس عدوانك وعدواني
يا بو جديلٍ بمنديل الدلع ملفوف=اما الثنايا مثل لولو ومرجاني
يا زين ليتك تجي في بيتنا وتشوف= حالة عليلٍ على ملاماك ولهاني
واختم لكم بهذه القصيدة والتي هي قريبت الى قلبي وللجميع مني كل حب وتقدير
خلصت من جملة الخلان
خلصت من جملة الخلان = احسن لي اعيش وحداني
ما عاد اعاشر جميع إنسان=يكفي العذاب الذي جاني
مادامت اللي هويته خان= اخشى اتورط مع ثاني
هويت انا قايد الغزلان=واهديت له قرة اعياني
عملت له طيب واحسان= وبالهجر والغدر جازاني
حقيقه انا الذي غلطان =وشلي بشخص تناساني
لا بد ما رجح الميزان= واعطيه من حيث معطاني
مع تمنياتي للجميع كل توفيق وجميعها كتبتها من ديوان شاعرنا ابوسعد وإن كان يوجد قصور في الطباعة او وجود بعض الاخطاء الاملائيه فارجو المعذره واتمنا ان تنال اعجابكوم
وشكرا
اخوكــ/م
مشـــاري مـــفـــلــــح الـــحـــــلــــــو
بعض من قصائد الشاعر الكبير/ محمد بن سعد الجنوبي
( تقرير عن مشاركة مخالفة ) ، و الموجودة أسفل كل مشاركة .