قلوب العاشقين صوت وصدى مع الشاعر الكبير حسن الوطري

[مناور بن هاجد]

صوت

ياحسن والبعد يدمي قلوب العاشقين=أوصف إعلاجٍ تشوفه وعجل ياحسن
أتسلى بالمثايل على بكـره تزيـن=والهواجس كل ماروحن مني لفـن
طير فكري كل ماحام ضاري للسمين=المعاني وافـره والبيـارق رفرفـن
ساهرن ليلي وأراقب نجوم الفرقدين=لين مايبدا نهاري ولاذقت الوسـن
أتوجد وأشهق بعبرتي والله يعيـن=وجد منهو من تذكر ربوعه والوطن
لاسكت حرك خفوقه ونينه والحنين=ولاحكى من حر مابه دموعه حدرن
حالته صعبه ولاهي تسر الشامتين=ماثمرت ريعان قلبه ولاجروحه برن
والتحيه ياحسن عدها امصافح يمين=الركايب سقتها عند بابـك نوخـن

شعر:مناور بن هاجد













صدى

مرحبا في مرحبا فيك يـاذرب اليميـن=عد مالاحت بـروق المخيلـه بالمـزن
نوخن ياركاب ابواحمد وقم بس ساعتين=وبعدها في حفظ منهو خلق انس ٍ وجن
انت اشوفك قمت تنبش لي الجرح الدفين=الجروح المبطيه مـن سبايبـك انزفـن
يا مناور خل قلبك على الفرقـا متيـن=لا تهيضك الطواري على ايـام ٍ مضـن
لا تشكى والهوى ذي طبوعه من سنين=هم مع تفكير وارهاق ونقـص ٍ بالبـدن
كان تبغا اعلاج ياصاحب القلب الحزين=طبق الوصفه وترتاح من هـم وحـزن
ما يفيد اعلاج والطب عنـدي يالفطيـن=العلاج المعتبر رص سن ٍ فـوق سـن
عطني العنوان واضح وكل قاسي يليـن=غير اقضب يدك يا صاحبي مني الرسن
كانها بالجاه من فضـل ربـي غانميـن=وكانها بالمال ندبل لها سـوق الثمـن
الامور اليا اجتهدنا بـاذن ربـي تزيـن=كلها من شان تفـرح ويرتـاح الجفـن

شعر:حسن الوطري