مبداي ذكر الله في سر وجهار=مشكاي لاضاق الفضاء والفسيحه
الواحد الرحمن النافع الضار=علامّ غصات القلوب الجريحه
علمٍ لفى قبل الجرايد والأخبار=يلدغ سواة الداب نسمع فحيحه
قالوا توفى ودّع الدار للدار=فقيد أبو غلاب ربي يبيحه
أبكي ونبكي كلنا صغار وكبار=مالوم عيني بدمعها في مطيحه
الموت ماخلا الردايا والأحرار=واللي لهم بالكون لجة وصيحه
حنا باثرهم عادة الوقت دوار=كلٍ ويومه منكتب بالصفيحه
وين النبي وين الصحابه والأخيار=يبقى العمل بالزين والا قبيحه
راح السنافي ريف الأصحاب والجار=الطيب اللي يستحق المديحه
لاشك مايوفيه قافي والأشعار=لكن تهيّض خافقي والقريحه
رواّد ديوانه من كبار وصغار=تلقى المسيّر والوجيه الفليحه
صفر الدلال وريحها بنّ وبهار=فنجالها للضيف قبل الذبيحه
يفرح لي جالة من الناس خطّار=وايديه للمحتاج ماهي شحيحه
عساه للجنة بعيدٍ عن النار=يارب روحه في هناء مستريحه
لاشك مال العبد في حكم الاقدار=وأختم كلامي في عبارة صريحه
ياليت يفدون النشاما بالاعمار=وأولهم المترديّة والنطيحه
ريف الاصحاب والجار . . . في رثاء العم/ مبارك غلاب بن دابس رحمه الله
( تقرير عن مشاركة مخالفة ) ، و الموجودة أسفل كل مشاركة .